Hondo yeIsrael neHamas yapinda musvondo rechina mutungamiri weAmerica VaJoe Biden, avo vari kutsigira Israel muhondo iyi, vachikurudzira mutungamiri weIsrael VaBenjamin Netanyahu kuti vakoshese hupenyu wevanhuwo zvavo vari mudunhu reGaza.
Hurumende yeAmerica yakatara chikwata cheHamas sematororo.
VaBiden vakurudzira VaNetanyahu kuti vabvumidze masangano akazvimirira akaita seUnited Nations kuti akwanise kuendesa chikafu nezvikwanisiro kuGaza, uko vanhu vazhinji vasisina zvekudya pamwe nemishonga yekurapa vanenge vakuvara.
Nyanzvi munyaya dzezvematongerwo enyika vachishanda vakazvimirira, Muzvinafundo Gadziro Gwekwerere, vanoti zvakakosha kuti mativi maviri aya ari kurwisana ataurirane kuitira kuti pave nerunyararo.
Vanoti hondo iyi inokwanisa kupararira mudunhu reMiddle East kana pakashaya vanokurudzira hurukuro dzekutsvaga runyararo.
"Hondo pakati peIsrael neHamas yave kutyisa nekuti dzimwe nyika dziri mudunhu reMiddle East dzave kutsigira mapoka maviri aya vanhu vachishandisa zvitendero zvavo zvakasiyanasiyana," Muzvinafundo Gwekwerere vaudza Studio7.
Vachitaura pamusoro penyaya yezvehupfumi hweZimbabwe, Muzvinafundo Gwekwerere vayambira kuti mitengo yezvekudya munyika inokwanisa kukwira kana mitengo yemafuta ikakwira nekudza kwehondo iyi iri muMiddle East umo munobva mafuta.
"Zvinhu zvikaramba zvichishata muMiddle East hondo yeIsrael neHamas ikaramba ichipisa zvichakonzera kukwira kwemitengo yemafuta, izvo zvichaita kuti mitengo yechikafu ikwire nyanya kunyika dzakadayi seZimbabwe, idzo dziri kutotarisana nedambudziko zvichitevera kuwondomoka kwehupfumi hwenyika," vanodaro Muzvinafundo Gwekwerere.
Your browser doesn’t support HTML5
Hurukuro naMuzvinafundo Gadziro Gwekwerere