Dare repamusoro nhasi ranzwa nyaya yakakwidzwa kudare iri nenhengo gumi neina dzebato rinopikisa, reCitizens Coalition for Change, (CCC) dziri kupikisa kudzingwa kwadzo mudare reparamende naVaSengezo Tshabangu, avo vanozviti ndivo vakafanobata chigaro chemunyori mukuru webato iri.
Mutongi wedare reHigh Court, VaMunamato Mutevedzi, vati vachapa mutongo wavo panyaya iyi dare reNomination Court risati ragara musi wa 7 Mbudzi, apo richatambira mapepa evanoda kupinda musarudzo dzekutsiva nhengo idzi.
Sarudzo dzacho dzichaitwa musi wa 09 Zvita gore rino.
Magweta enhengo dzeCCC anoti agadzirisa mapepa ari kudare achibvisa mutauriri weNational Assembly, VaJacob Mudenda pamwe nemutungamiri wedare reSenate, Amai Mabel Chinomona, pavanhu vakakwirirwa dare. Magweta aya haana kupa zvikonzero zvekugadzirisa mapepa aya pamberi pedare ranhasi iri.
Gweta reCCC, Muzvare Amanda Sihle Ndlovu
Gweta ranga rakamirira vaviri ava, VaShingirayi Hoko, vatenda kuvatori venhau kuti vaviri ava havasisiri munyaya iyi.
Vati,” Nyaya dzichirerekera kumutauriri weNational Assembly nemutungamiriri weSeneti yabviswa mudare kureva kuti havana mhosva yavarikunzi vakaita.”
Mutevedzeri wemutauriri weCCC, VaGift Ostallos Siziva, vabvuma kuti ndizvo zvaitika mudare. Vati, “Dare rataura kuti richapa mutongo waro dare reNomination Court risati ragara musi wa7 Mbudzi. Saka isu tinemufaro kuti mutongo uyu uchauya 7 asati asvika nekuti zvichabuda izvi zvinobatsira kuenda mberi.”
VaSiziva vatiwo vaudza dare kuti VaTshabangu havasi nhengo yebato ravo uye nhengo dzavo dzakadzingwa hadzina kumbopiwa matsamba. Vati, “Taenda kudare kuti zvinobuda pachena kuti akadzinga uyu anemasimba here ekudzinga vanhu ava uye kuti ndiye here akabata chigaro chemunyori?
"Sakai ye ndiye anofanirwa kutaura kuti ndizvo here. Chepiri haana kuratidza kudare kuti nhengo idzi hadzisiri nhengo dzeCCC nekuti izvi ndozvinodzingisa vanhu mudare.”
Rimwe remagweta anga akamirira VaTshabangu, VaXobani Sithole, vati vane chivimbo chekuti VaTshabangu vachakunda. Vati, “Tine chivembimbo chekuti achakunda nekuti ndiye akasanobata chigaro chemunyori muCCC zvinotozivikanwa.”
VaTshabangu vakadzinga nhengo dzeparamende makumi maviri neina pamwe nemakanzura ane chitsama.
VaSengezo Tshabangu
Panga pachinzwikwa nyaya iyi mudare mapurisa anga akadyarwa mukati nekunze kwedare reHigh Court anga achidzingawo dzimwe nhengo dzeCCC pedyo nedare iri.
Nhengo dzakadzingwa mudare naVaTshabangu dzichinzi hadzina kusarudzwa nevanhu dzinosanganisira VaPrince Dubeko Sibanda vekuBinga, naVaFebion Munyaradzi Kufahakutizwi vekuMabvuku-Tafara.
Asi zita raNomathemba Sibanda wekuMatabeleland South harisi pamazita evanhu vari kupikisa mumatare kudzingwa kwavo naVaTshabangu.
VaTshabangu vakadzingawo zvakare makanzura, kusanganisira meya weguta reMasvingo, Muzvare Shantiel Yeukai Chiwara.
Your browser doesn’t support HTML5
Nyaya ina Rutendo Mawere