Manica Diamonds yazviomesera apo yarohwa neSheasham 2-0 nhasi masikati munhandare yeBata.
Manica Diamonds yacho yabva yabatwa pamapoinzi makumi mashanu neFC Platinum iyo yashanya kuBulawayo ndokunorova Chicken Inn 1-0.
FC Platinum, iyo inorairidzwa naNorman Mapeza, ndiyo ine mukombe uyu.
KuHwange mangwana, chikwata ichi chiine nhoroondo yakasimba yekurova zvikwata zvine mukurumbira pese painowanzotambira munhandare yeColliery iyi.
Nhoroondo iyi inodzokera kumashure kusvika kuma 70s apo zvikwata zvakaita sana Dynamos, Arcadia, Black Aces, Rio Tinto,Zimbabwe Saints, Caps United, neHighlanders zvaishanya zvichidzoka zvisina chazvakabata.
Gore rino chairo chikwata ichi chakarova Highlanders 1-0 apo Bosso yaitungamira makundano ePremiership aya ndokukanganisa chinangwa chayo.
Ngezi Platinum Stars FC
Chimwe chiri kupa Hwange simba ndechekuti iri kuda kubva pazvikwata gumi nezviviri izvo zvakatarisana nekubuda mugungano iri nemhaka yekukundikana.
Pari zvino Hwange ine mapoinzi makumi matatu nemanomwe uyezve pachinhanho chechipfumbamwe asi haina kunyanya kusiyana nezvikwata zviri pasi payo.
Ngezi ndiyo iri kutungamira gungano iri nemapoinzi makumi mashanu nemanomwe, mapoinzi manomwe pamusoro peManica Diamonds.
Mubati wepagedhe weNgezi Chang Marioni anoti chishuwiro chake kuti vatore mukombe weligi neweChibuku Super Cup uyo vari mufainari yavari kusangana neDynamos musi wa 3 Zvita.
“Kana riri gore renyu zvinoita chete. Chirikudiwa chete kuti tirwe tiri pamwechete.Tinotora zvese, hapana chinotimisa,” adaro Marioni.
Asi mutsigiri wemutambo wenhabvu VaOliver Musongoro vanoti Ngezi haisi kuzoitirwa nyore nekurova Hwange nekuti mutambo uyu wakaoma.
“Ma teams ese arikutamba aya. Kuti tizive kuti pane anokunda, pakaoma. Vese varikutamba uyezve varikuda kukunda,” vadaro VaMusongoro.
Dynamos iyo iri pachinhanho chechina nemaponzi makumi mana nemapfumbamwe ine mutambo muNational Sports Stadium mangwana neBlack Rhinos.
Black Rhinos FC
Kukunda kweSheasham kwaibatsira kubva pazvikwata zvina zvakatarisana nekubuda mugungano iri.
Sheasham yave pachinzvimbo chegumi neina ndokuswetuka Triangle iyo yakundwa 1-0 neCranbourne muNational Sports Stadium.
Mutambo uyu waonekwa nevanhu vanga vachiverengeka muhushoma hwavo munhandare hombe iyi.
Asi kunyange yakunda Cranbourne yaramba iri pasi pasi nemapoinzi makumi maviri nematanhatu, mapoinzi maviri pasi peBlack Rhinos.
Mimwe mitambo yeMugovera yapera seizvi ..
Greenfuel 1 Byo Chiefs 0, Simba Bhora 1 Herentals 0.
Mutambi weCaps United, William Manondo.
Asi mitambo ichange yakati fararira nyika yese neSvondo, kusanganisira uyo uri muBarbourfields Stadium pakati peHighlanders neCaps United.
Caps United iri panguva yakaoma sezvo iine mapoinzi makumi matatu nemanomwe uyezve pazvikwata zviri patambo.
Asi mumwe mutsigiri wemaGreen Machine VaMaxwell Mathonsi vanoti chikwata chavo hachisi kutamba zvakana nekuti murairidzi wavo arikutambisa vatambi vakwegura.
“Mazuva ekare kwaitambiswa ana Alois Bunjira vari vadiki. Tainakidzwa nebhora ravo vachirairidzwa namushakabva Steve Kwashi. Kozotiwo Charles Mhlauri aitambisa vechidiki tichiona zvitsva. Ikozvino hatisi kuona zvitsva,” vachema VaMathonsi.
Yadah iyo iri patambo zvekare irikuvhara mitambo yesvondo rino nemutambo muBaobab Stadium neZPC Kariba.