Chikwata chiri kutungamira makwikwi eCastle Lager Premier Soccer League, cheNgezi Platinum Stars, charohwa neHwange asi chiri kuramba chiine hutungamiri hwakasimba mumakwikwi aya.
Chikwata ichi charohwa 1-0 neHwange, iyo yanga iri pamusha muColliery, asi ndokuramba chakatungamira makundano aya nemapoinzi manomwe kwasara mitambo mina chete kuti makundano aya apere.
Ngezi yaramba iine mapoinzi makumi mashanu nemanomwe, mapoinzi manomwe pamusoro peManica Diamonds, Dynamos, neFC Platinum, idzo dzakaenzana pamapoinzi makumi mashanu.
Izvi zvauya mushure mekunge Dynamos yatatarika ndokutadza kurova Black Rhinos kuti idimbure hutungamiri hweNgezi kusvika pamapoinzi matanhatu.
Dai Dynamos yakunda yanga ichipinda mumapoinzi makumi mashanu nemaviri pachiri nemitambo mina kuti makwikwi apere.
Black Rhinos FC
Asi vaona mutambo wayo neRhinos vari kudura kuti Rhinos yanga ichifanira kukunda mumutambo uyu, asi yatambisa mikana yakawandisa yayawana.
Chero murairidzi weBlack Rhinos, Saul Chaminuka, ari kuchema nemapango avanga vachingorova mumutambo uyu.
“Taita mikana yakawandisa yekuti tikunde. Tarova mapango kanokwana kana asi hatina kuwana chibodzwa.
"Ramangwana redu tichagadzirisa zviri kunetsa izvi kuti timbofara,” anovimbisa Chaminuka.
Highlanders yatadzawo kushandisa mukana wekuenda pachinhanho chechipiri mushure mekuita mangange 1-1 neCaps United muBarbourfields.
Bosso yanga ichifanira kupinda mumapoinzi makumi mashanu nerimwechete nekukunda, asi iri mumapoinzi makumi mana nemapfumbamwe nepoindi yayawana pamutambo wayo neCaps United uyu.
Mutsigiri wemutambo wenhabvu, VaTinashe Museti, vanoti makundano aya asvika panguva iri kunakidza asi pakugumisira Ngezi ndiyo iri kutora mukombe uyu.
“Mamiriro acho aita PSL ave kuda kunakidza. FC Platinum iri kufemerawo Ngezi muhuro, asi muno muHarare hamuna chimuko. Ngezi yatora,” vadaro VaMuseti.
Yadah FC
Mutsigiri weDynamos, VaLameck Jakopu, vanobvumiranawo nazvo vachiti vaimboona sekunge Dembare ndiyo ichatora mukombe asi mafambiro aita mitambo ari kuratidza kuti chimuti chiri kuenda neMadamburo.
“Ndiri kuona zvangu ndaiti Dynamos inotora asi Ngezi inoenda nechimuti. Muno muHarare hamusisina chikwata chinokwikwidzana neNgezi kana FC Platinum. Asi gore rino, ndere Ngezi,” varikududzira VaJakopu.
Mangange neDynamos asiya Black Rhinos yave kuda mashiripiti chaiwo kuti irambe iri mugungano iri.
Rhinos, iyo ine mapoinzi makumi maviri nemasere, yasiiwa nemapoinzi matanhatu neYadah iyo yabata chinhanho chekugumisira mukurarama mumakwikwi aya.
Yadah yazvirerutsira muhondo iyi apo yarakasha ZPC Kariba 5-0 muBaobab Stadium nhasi masikati, ndokukanda ZPC yacho pachinzvimbo chegumi neshanu.
Cranbourne Bullets ndiyo iri pasi pasi mugungano iri nemapoinzi makumi maviri nematanhatu uyezve kurarama kwayo kurikuratidza kuti hapasisina.