Hondo pakati peIsrael neHamas iri kuenderera mberi ichipinda mumwedzi wechipiri, panguva iyo mutungamiri weIndonesia, VaJoko Widodo, vapa chikumbiro kune mutungamiri weAmerica, VaJoe Biden, kuti vataure nemutungamiri weIsrael, VaBenjamin Netanhau, kuti vawone zvavangaite kuti hupenyu hwevanhuwo zvavo vasineyi nehondo vari muGaza huchengetedzwe.
VaWidodo vataura izvi vari kumuzinda weWhite House muAmerica umo vari kushanya uye nyika yavo ndiyo ine vatenderi vechiMuslim vakawanda.
Bazi rezvehutano remuGaza, iro rinonzi riri kushanda neHamas, iyo inonzi nehurumende yeAmericachikwata chematororo, rinoti vanhu vashaya muhondo iyi vemuPalestine vadarika zviuru gumi nechimwe, kana kuti 11,000.
Israel inotiwo vanhu vashaya muhondo iyi munyika mayo vanodarika chiuru nemazana mana, kana kuti 1,400.
Pari zvino pane zvizvarwa zveIsrael zvinodarika mazana maviri nemakumi matatu zvakatapwa neHamas, izvo zvinonzi neIsrael zvinofanirwa kutanga zvasunungura kuti hondo iyi ipere.
Vamwe vari muAmerica vari kuungana muWashington D.C. vachiratidzira rutsigiro rwavo kuIsrael muhondo iyi.
Muwongorori wenhau dzehupfumi vachishanda nesangano reCentre for Disability and Development, asi vachitaura vakazvimirira, VaMasimba Kuchera, vanoti vanotsigira chikumbiro chaturwa naVaWidodo kuna VaBiden, vachiti sezvo America iri imwe yenyika dziri kutsigira Israel muhondo iyi inogona kunzwikwa yakataura iri iyo neIsrael.
Your browser doesn’t support HTML5
Hurukuro naVaMasimba Kuchera