Hondo pakati peIsrael neHamas iri kuenderera mberi panguva iyo vanowongorora zvehutano vari kukurudzira masangano akadayi seUnited Nations World Health Organisation ari kukurudzira kuti parambe paine nhaurirano dzinopedza hondo.
Hurumende yeAmerica yakatara Hamas sechikwata chematororo.
Hurukuro dzerunyararo kuitira kuti hondo pakati pemapato maviri aya iyo yave mumwedzi weChipiri.
Mutungamiri weAmerica, VaJoe Biden, vachitaura pamusoro pezviri kuitika muhondo iyi neChipiri vakakurudzira kuti zvipatara zvichengetedzwe.
Mutungamiri wehurumende yeIsrael, VaBenjamin Netanyahu, havasati vatambira zvikumbiro zvekuti hondo iyi imbomiswa vachiti chikwata cheHamas chinofanirwa kutanga chaburitsa muhutapwa zvizvarwa zveIsrael zvakatapwa zvinodarika zviuru zviviri.
NeChipiri zviuru nezviuru zvevagari vemuAmerica zvakaratidzira zvine mutsindo muguta guru reWashington D.C. zvichiratidza rutsigiro rwazvo kunyika yeIsrael nekukurudzira kuti vakapambwa neHamas vadzoswe.
Muwongorori wenhau dzehutano uye vari chiremba, Dr. Simbiso Ranga, vanoti sachiremba vari kushungurudzika nezvavari kuwona zvichiitika muhondo iyi.
Vanoti pasi rose, kunyanya sangano reUnited Nations, rinofanirwa kuramba richipa chikumbiro chekuti pave nekumiswa kwehondo pakati peIsrael neHamas sezvo vanhu vazhinji vasineyi nehondo iyi vari kukuvadzwa nekurasikirwa nehupenyu.
“Pasi rose rakatarisa kuti hondo iyi ichapera seyi uye masangano akadayi seWorld Health Organisation, ari kuti zvinhu hazvina kumira mushe muzvipatara zvemuGaza. Shuwiro yedu savanachiremba ndeyekuti pave nenhaurirano dzerunyararo uye kuti hondo iyi ipere,” Dr. Ranga vaudza Studio7.
Your browser doesn’t support HTML5
Hurukuro naDr Simbiso Ranga