Zimbabwe Catholic Bishops Conference yanyora tsamba kuvatendi ichishora zvikuru danho rekudzinga nhengo dzedare reparamende, maseneta nemakanzura ebato guru rinopikisa reCitizens Coalition for Change achiti ndezvimwe zvave kukonzera mhirizhonga nekusagadzikana munyika.
Vari kuzviri ndivo vakafanobata chigaro chemunyori mukuru webato reCCC pasina humbowo hwekuti vakasarudzwa sei VaSengezo Tshabangu ndivo vari kudzinga nhengo dzebato iri vachinzi nevamwe vari kushandiswa sembato nebato reZanu-PF.
Mutsamba yakanzi, “The Coming of Christ, The Prince of Peace”, mabishopu eRoma ati nyaya yekudzingwa kwenhengo dzeCCC mudare reparamennde nemakanzuru yapa kuti kuitwe sarudzo dzemaby elections zvopa kuti mhirizhonga itangezve munyika.
Nhengo yebato rinopikisa reCCC Mufundisi Tapfumaneyi Masaya vakapambwa nekupondwa nevanofungidzirwa kuti vatsigiri veZanu-PF kuMabvuku muHarare. Vamwe vatsigiri vebato iri vari kupambwa nekutochwa zvakaipisisa nevanofungidzirwa kuti vasori.
MaBishopu eRoma ari kukurudzira mhuri yeZimbabwe kuti isatsigire vanoita zvemhirizhonga. Bato reZanu-PF riri kuramba mhosva yariri kupomerwa yekuita mhirizhonga uye riri kuramba kuti riri kushanda naVaTshabangu.
Nyanzvi munyaya dzezvematongerwo enyika vachikokera mabasa musangano reSouthern Africa Liason Office kana kuti SALO VaMunjodzi Mutandiri vati Zanu-PF haisi kuratidza kuzvipira kugadzirisa matambudziko akatarisana nenyika vakayambira kuti munyika mune runyararo mukatanga mhirizhonga inozonetsa kuimisa.
Vati maBishopu abaya dede nemukanwa pane zvavari kutaura mutsamba yavo.