Chibvumirano chekumbokanda zvombo pasi pakati peIsrael neHamas chapinda muzuva rechitanhatu neChitatu mativi maviri aya achitarisirwa kusunungura vamwe vari muhunhapwa uye muhusungwa.
Hurumende yeAmerica yakatara Hamas sechikwata chematororo.
Nhaurirano dzekuwedzera nguva yekuti kurwisana kumbomira dziri kuenderera mberi dzichitungamirirwa neQatar.
Mutauriri mukanzuru inoona nezvekudzivirirwa kwenyika yeAmerica, kana kuti U.S. National Security Council, VaJohn Kirby, vatiwo America iri kushanda neIsrael, Qatar neEgypt kuti iwedzere nguva yekumisa kurwisana. Israel inoti neChipiri vanhu gumi nevaviri vainge vari muGaza vakasungunurwa manheru.
Israel yakabva yasungunura vasungwa vekuPalestine makumi matatu. Hamas inonzi yakapamba vanhu vemuIsrael mazana maviri nemakumi mana, kana kuti 240 apo yakatanga kurwisa Israel musi wa 7 Gumiguru.
Vanoona nezvehutano muGaza vanoti Israel yauraya vanhu vanodarika zviuru gumi nezvishanu, kana kuti 15,000.
United Nations Security Council iri kutarisirwawo kuita musangano wakanangana nekuzeya kurwisana pakati peIsrael neHamas.
Mutungamiri webato rinopikisa reDemocratic Party Doctor, Wurayayi Zembe, vanoti kumbokanda zvombo pasi kunobatsira kuti vari muhutapwa nehusungwa vaburitswe.
Your browser doesn’t support HTML5
Hurukuro naMuzvinafundo Urayai Zembe