NeChipiri svondo rino dare repamusoro peHigh Court rakapa mutongo unochenura nhengo yeCitizens’ Coalition for Change, VaJob Sikhala, pamhosva yavaipomerwa yekuvhiringidza mapurisa kuita basa rawo paiferefetwa kupondwa kwenhengo yeCCC, Muzvare Moreblessing Ali kuNyatsime gore rapera.
Kuchenurwa kwaVaSikhala, avo vachiri muhusungwa nekuda kwedzimwe nyaya dzavari kupomerwa, kunotevera kupikisa kwavakaita mutongo wedare repasi ramejasitiriti wekuti vaive nemhosva vachibva vatongerwa kugara mujeri kwemwedzi mitanhatu iyo yakasendekwa parutivi vachinzi vabhadhare faindi yemadhora ekuAmerica mazana matanhatu.
VaSikhala vadarika mazuva mazana mashanu nemakumi matatu vari muhusungwa, vanorwira kodzero dzevanhu pamwe nevebato rinopikisa reCCC vachiti vari kungoshungurudzwa nehurumende pamwe neZanu PF nekuda kwenyaya dzezvematongerwo enyika.
Asi hurumende neZanu PF vagara zvavo vachiti havapindiri mune zvinenge zvichiitika kumatare edzimhosva.
Nhengo yeCCC mudunhu reNorth America, VaTawanda Dzvokora, vanoti zvinorwadza kuti VaSikhala vapedza mazuva ose aya vari mujeri vozonzi nematare havana mhosva chinhu chinorwadza zvikuru, vachiti hurumende inofanirwa kuvakumbira ruregerero pamwe nemhuri yavo.
VaDzvokora vanoti, "Zvakaitwa neHigh Court anonzi matanda nyadzi. Vazviona kuti vari kuvharira munhu asina mhosva, vachisiya mhombwe, vachisiya mhondi, vachisiya vanhu vari kutyora mutemo."
Asi nhengo yeZanu PF mudunhu reBritain uye vari gweta, Doctor Masimba Mavaza, vanoti hurumende haifanirwe kukumbira ruregerero, vachiti kuwanikwa munhu asina mhobsa nematare hakurevi kuti munhu haana kupara mhosva, asi kuti angowana kamukana kekubuda nako mumhosva.
"High Court yaratidza nekunyadzisa vanotaurisa kuti aiwa, kana makakwira nenyaya yenyu kumatare ekumusoro inotariswa isingatariswi kuti wabuda mumba maani. MuZimbabwe muchine mutemo. Rule of Law ichiri kushanda," vanodaro Doctor Mavaza.
Your browser doesn’t support HTML5
Hurukuro naDoctor Masimba Mavaza Pamwe naVaTawanda Dzvokora