Pope Francis vabatana nevamwe vari kukurudzira kuti hondo pakati peisrael nehamas imbomiswa kuitira kubatsira vasina zvekudya uye vakakuvara.
Kurudziro iyi iri kubvawo kuvakuru veUnited Nations nedzimwe nyika dzakavhotawo neChipiri kuti vari kurwisana vambomira kurwisana.
Asi hondo iri kuenderera mberi Israel ichizivisa kuti mauto ayo gumi akaurayiwa muGaza nemusi weChitatu. Israel yakati yakawanawo mitumbi yevamwe vanhu vaviri vainge vapambwa neHamas.
Mauto eIsrael anotiwo akauraya varwi veHamas vakawanda. Mutungamiri wenyika yeAmerica VaJoe Biden vari kukurudzira Israel kuti isauraye vanhwo zvavo muhondo iyi.
Asi America neBritain idzo dzinoti Hamas inopfurikidza mwero dzakaitemerawo zvirango nezuro.
Nyanzvi munyaya dzezvehupfumi vachiongorora zvematongerwo enyika Muzvinafundo Elliot Masocha vanodzidzisa paDevry University kuOhio muno muAmerica vanoti zvakakosha kuti hondo imbomira kuti vanhu vawane rubatsiro asi vakati zvinonetsa kupedza hondo iyi.