Nhengo yeCitizens Coalition for Change iri muhusungwa, VaJob Sikhala, vapinda mudare ramejasitiriti vachitarisira kupiwa mutongo wavo pamhosva yavari kupomerwa yekuparidza manyepo.
Asi mutongi wedare ramejasitiriti anonzi aendesa mberi nyaya iyi kumusi wa 03 Ndira gore rinouya.
Rimwe remagweta aVaSikhala, VaObey Shava, vaudza vatori venhau kuti vanga vaine tarisiro yekugurwa kwemutongo waVaSikhala asi vachuchisi havana kuendesa mhinduro yavo pamberi pedare nenguva, izvo zvaita kuti dare riti rinoda nguva.
VaSikhala vari kupomerwa mhosva yekushambadza manyepo ekuti kune mwana akafira kumusana kwaamai vake mushure mekurohwa nemapurisa.
Iyi imwe yemhosva dziri kupomerwa VaSikhala, avo vagara mwedzi gumi nemisere vari mujeri reChkurubi vakamirira kutongwa.