Vachuchusi vehurumende vakundikana nhasi mudare kuti vaburitse vhidhiyo yavakaudza dare kuti vanayo inoroverera vaive mumiriri weZengeza West VaJob Sikhala pamhosva yavari kupomerwa yekuti vaipesvedzera vanhu kuti vapandukire hurumende muna 2020. Gweta raVaSikhala, VaHarrison Nkomo vaudza Studio 7 kuti nyaya iyi yabva yapfuridzwa mberi. Izvi zviri kuuyawo mapurisa ekuLupane arambidza vatsigiri vaVaSikhala veJob Sikhala Solidarity Council kuratidzira vachiti havana kutevedzera zviga zvemutemo we Maintenance of Peace and Order Act.
Hurumende iri kurambidza vanopikisa kuratidzira kunyangwe iri kushorwa neUnited Nations, vanopikisa nevanorwira kodzero dzevanhu sezvo kuratidzira murunyararo iri kodzero mubumbiro remitemo.
Mutauriri wemapurisa Assistant Commissioner Paul Nyathi nemutauriri wemutungamiri wenyika VaGeorge Charamba vakamboburitsa mashoko kuvatori venhau vachiti pane runyerekupe rwekuti pane vanhu vari kuda kuratidzira vokonzera kusagadzikana munyika.
Mutauriri weJob Sikhala Solidarity Council VaObert Masaraure vanoti zvose zviri kuitwa zvinoratidza kuti hurumende iri kumbunyikidza kodzero dzaVaSikhala.
Asi gurukota rezvemitemo VaZiyambi Ziyambi vanoti hapana munhu anofanira kupindira pane zviri kuitika kumatare nekuti akazvimirira. Vanopopikisa vanoti matare anorerekera kuhurumende.
Your browser doesn’t support HTML5
Hurukuro naVaObert Masaraure