Dare repamusoro reHigh Court rakamisa bazi rezvekurima, mudzviti uye mapurisa avo vaiti vatumwa nemutungamiri wenyika VaEmmerson Mnangagwa kudzinga mudzimba mhuri mazana masere papurazi reSkea kuNorton, Mashonaland West.
Vashandi ava vanoti vakasiirwa dzimba idzi nemurungu wavaishandira uyo akazotorerwa purazi uye havana kwekuenda. Asi mutongi wedare repamuso VaRogers Manyangadze vakati nzira yaida kudzingwa nayo vanhu ava haisi pamutemo.
Hatina kukwanisa kutaura negurukota rezvekurima VaAnxios Masuka kana gurukota rezvemukati menyika VaKazembe Kazembe sezvo vose vange vasiri kudaira nharembozha dzavo.
Asi gweta rakamirira mhuri idzi uye vari nhengo yeZimbabwe Lawyers for Human Rights, Muzvare Rutendo Muchenje vanoti vanhu ava vange vachibhadharawo mitero kubazi rezvekurima kwemakore akawanda kuti vakwanise kurima.
Your browser doesn’t support HTML5
Hurukuro NaMuzvare Rutendo Muchenje.