Hurumende dzeZimbabwe neBelarus nhasi dzasayinirana zvibvumirano zvekushandidzana munhau dzezvekurima pamwechete nezvemaindasitiri, dzichivimbisana zvekare kusimbaradza hukama munyaya dzekuchengetedza nyika, dzidzo nezvicherwa.
Asi hukama hwenyika mbiri idzi hunonzi nevamwe ndehwehurumende dzinotonga nedemo.
Vachitaura pakupetwa kwemusangano wemazuva mana pakati pemakurukota eZimbabwe neBelarus, we”First Session of the Joint Permanent Commission on Cooperation” wanga uchiitirwa muHarare, gurukota rekuBelarus rinoona nezvekudyidzana nedzimwe nyika, VaSergei Aleinik, vati nyika yavo haisi ichasimbaradza kudyidzana kwayo neZimbabwe.
Sezvo dzichinanzvana dzakakora, mashoko aVaAleinik aya atsigirwa nemumwe wavo, VaFrederick Shava, vanove gurukota rinoona nezvekudyidzana nedzimwe nyika muZimbabwe.
Asi vanowongorora nyaya dzezvematongerwo enyika, VaRashweat Mukundu vanova chipangamazano musangano reInternational Media Support vati hukama hweZimbabwe neBelarus ndehwehurumende dzinoita mabasa erima.
Ukuwo, VaGibson Nyikadzino, avo vanoongororawo zvematongerwo enyika vakazvimirira, vanoti vanopokana nemaonero aya.
Mutungamiri wenyika VaEmmerson Mnangagwa, pamwe nemutungamiri weBelarus, VaAleksandr Lukashenko, pamwechete nemakambani akati kuti vakatemerwa zvirango zvehupfumi nenyika dzekumadokero, dzinosanganisira America, vachipomerwa mhosva yekutonga nedemo.
Asi kunyange zvakadaro, nyanzvi inoongorora zvehupfumi hwenyika, uye vari mukuru wekambani yeFinx Zimbabwe, Muzvare Happiness Zengeni, vanoti havaoni chakaipa chinogona kuwira makambani emuno angada kuita bhizimusi nekuBelarus.
Asi America neEuropean Union dzakatemera vamwe vemabhizimisi muZimbabwe neBelarus vanogara vachiyambita kuti vanotyora mutemo panyaya iyi vanogona kuguma vazvikanda mukanwa mamupere.
Papera musangano wanhasi, zvaziviswa kuti mutungamiri wenyika, VaMnangagwa, vachashanyira mumwe wavo, VaLukashenko kuBelarus gore rino risati rapera, apo pari kutarisirwa kuzosayinirwana zvimwe zvibvumirano zvekare zvinosanganisira chekushanda pamwechete kwenyika idzi.
Dzimwewo nyanzvi dzinowongorora kudyidzana kweZimbabwe nedzimwe nyika, dzinoti kuvanzwa kwezvibvumirano zvekushandira pamwechete munyaya dzezvekudzivirirwa kwenyika pakati peZimbabwe neBelarus, kunogona kuita kuti veruzhinji vafungidzire kuti pane chitsotsi chinenge chichiitwa nevakuru vehurumede mbiri idzi.
Makambani ekuBelarus ari kudyidzana neZimbabwe anosanganisira Zimgoldfields inochera goridhe kuManicaland, Minsk Automobile yanyorerana chibvumirano neAVM Africa.
Your browser doesn’t support HTML5
Nyaya Ina Tobias Mudzingwa