Mutungamiri werimwe sangano rinorwira kodzero dzevabvakure vari muSouth Africa, rePeople’s General Foundation, VaShelton Chiyangwa, vanoti vari mushishi rekuunganidza rubatsiro rwechikafu nezvekupfeka zvekubatsira zviuru zvezvizvarwa zveZimbabwe zvakadzingwa mudzimba dzazvo munzvimbo yeNew Rest kuWellington muCape Town, mushure memhirizhonga yakaitika pakati pesvondo rino.
Mhirizhonga iyi inonzi yakatanga mushure mekuuraiwa kwechimwe chizvarwa chenyika iyi nevanofungidzirwa kuti vanobva kuZimbabwe, zvakaita kuti vagari venzvimbo iyi vadzinge zvizvarwa zveZimbabwe zvinosvika kana kudarika zviuru zvitatu nemazana mashanu, kana kuti 3 500, izvo zvakazonopotera kukamba yemapurisa pachiitwa nhaurirano dzekuunza runyararo.
Studio7 haina kukwanisa kubata mapurisa emunharaunda iyi kuti tinzwe divi ravo sezvo nhare dzavo dzange dzisingadairwe.
"Parizvino panenhaurirano dziri kuitwa dzekuyedza kuyaaanisa vagari vemunzvimbo iyi nezvizvarwa zveZimbabwe kuti avo vakadzingwa vadzokere kumisha dzavo," VaChiyangwa vaudza Studio7.
"Tiri kuita zvese zvatinokwanisa tichishanda nemamwe masangano ari muCapeTown kuitira kuti vese vakatarisana nedambudziko iri vawane zvekudya nezvekupfeka.
"Zvizvarwa zveZimbabwe zviri muSouth Africa zviri kuita zvese zvavanokwanisa kuitira kuti tibatanidze rubatsiro rwunemutsindo," VaChiyangwa vaenderera mberi.
Your browser doesn’t support HTML5
Hurukuro naVaShelton Chiyangwa