Dare redzimhosva remudunhu reNew York nemusi weMuvhuro rakadzikisa mari yechibatiso yarakanga rati vaimbova mutungamiri we America, VaDonald Trump vabhadhare.
VaTrump vari kukwikwidzawo zvakare musarudzo yemutungamiri wenyika muna Mbudzi vachitarisirwa kutatsurana zvakare nemutungamiri wenyika VaJoe Biden.
VaTrump vakawanikwa vaine mhosva yekunyepa pamusoro pekukosha kwezvivakwa zvavo vachiitira kuti vakwereteswe mari zhinji nemabhanga. Izvi zvinonzi zvakakonzera kuti dunhu reNew York rirasikirwe nemari yakawanda kwemakore akawanda.
VaTrump vakabva vakwira kudare repamusoro vachikwikwidza nyaya iyi asi vakaudzwa kuti vanofanirwa kubhadhara mari inoita mamiriyoni mazana mana ane makumi mashanu nemana kana kuti US$454 million yechibatiso iyo yazodzikiswa kusvika pamamiriyoni zana rine makumi mashanu nemanomwe kana kuti US$175 million.
Gweta, VaKennedy Masiye, vanoshanda nesangano reAll Hands on Justice vaudza Studio 7 kuti VaTrump vanofanira kuchenjerera nyaya yevharamuromo sezvo ichigona kuvaendesa mujeri.
Nyaya iyi iri kunzwikwa musi wa 15 Kubvmbi.