Sangano reCrisis in Zimbabwe Coalition rinomirira masangano akazvimirira oga makumi masere rinoti harisi kuzoenda kumusangano weSADC Non-State Actors Engagement meeting uri kuitirwa kuRainbow Towers kutanga musi nemusi weMuvhuro.
Sangano iri rinoti riri kutsutsumwa nekuitwa kafiramberi kwevamwe vanorwira kodzero dzevanhu munyika nevanopikisa zvinonzi zviri kuitwa nevasori nemapurisa.
Sangano remagweta reLaw Society of Zimbabwe rinoti riri kutaura nehurumende nenyaya yekuitwa kafiramberi kwakaitwa munyori mukuru wesangano reAmlagamated Rural Teachers Union of Zimbabwe kana kuti ARTUZ VaRobson Chere.
VaChere nevamwe vatatu vakapambwa mundege panhandare yeRobert Mugabe International Airport pavanonzi vakabva varoverwa nevanofungidzirwa kuti vasori vasati vaendeswa kuHarare Central Police Station.
Asi mutauriri wemapurisa Assistant Commissioner Paul Nyathi vakaudza Studio 7 kuti vanenge vachiti vatyorerwa kodzero dzavo vanofanira kumhan’ara kumapurisa.
Your browser doesn’t support HTML5
Mashoko aCommissioner Nyathi
Mutauriri wemukuru weSADC VaElias Magosi ati vange vakabatikana.
Asi tabata mutauriri weCrisis in Zimbabwe Coalition VaMarvellous Kumalo vaudza Studio 7 kuti havangaende kumusangano weSADC vamwe vari mumajeri.
Your browser doesn’t support HTML5
Hurukuro naVaMarvellous Kumalo
Sangano guru rinomirira vashandi pasi rose reInternational Trade Union Confederation ranyorawo tsamba yenyuyuto kugurukota rezvemutemo VaZiyambi Ziyambi vachitsutsumwa nenyaya yekumbunyikidzwa kwavanoti kuri kuitwa vanorwira kodzero dzevanhu.
Sangano iri rati Zimbabwe iri kutyora zvibvumirano zvayakanyorerana nedzimwe nyika zvakaita seUniversal Declaration of Human Rights International Covenant on Civil and Political Rights (ICCPR), neAfrican Charter on Human and Peoples’ Rights.
Hatina kukwanisa kubata VaZiyambi kuti tinzwe divi ravo panyaya iyi.