Mutori wenhau ane mukurumbira, Simba Rushwaya, akashaya neChitatu mangwanani kuchipatara cheParirenyatwa muHarare.
Munyori mukuru wesangano revatori venhau, reZimbabwe Union of Journalists, ZUJ, Perfect Hlongwane, akaudza Studio 7 kuti sangano ravo rakatambira shoko rekushaya kwaRushwaya nekusuwa kukuru achiti Zimbabwe yarasikirwa zvakare nemutori wenhau anga aine hunyanzvi.
Rushwaya, uyo anga ave nemakore makumi mana nemapfumbamwe, akashanda semutori wenhau kumapepanhau akasiyanasiyana anosanganisira reAssociated Newspapers of Zimbabwe, Zimbabwe Mirror, Gauteng Guardian, Alpha Media Holdings, neManica Post iri pasi pekambani yeZimpapers.
Kuchange kuine munamato paimba yerunyararo paNyaradzo muna Herbert Chitepo kutanga nenguva dza 10:30 mangwanani anhasi China.
Mutumbi uchabva wangosimuka panongopera munamato uchipfuura nekumba kwake kuDamofalls uchizoendeswa kumusha kwake kwaRushwaya ku Birchenough Bridge, uko achazoradzikwa neChishanu 16 Nyamavhuvhu, 2024.
Your browser doesn’t support HTML5
Hurukuro naPerfect Hlongwane