Vaimbove mumiriri weBinga North mudare reparamende vari nhengo yeCCC VaPrince Dubeko Sibanda vamiswa pamberi pedare ramejastiriti muHarare.
VaSibanda vari kupomerwa mhosva yekukurudzira vanhu kuita mhirizhonga kuburikidza nezvinyorwa zvavakaisa padande mutande re X ne Whatsaap mumapoka ebato ravo re CCC
Mutongi wedare raMagistrate, VaMarewanazvo Gofa, vati vachatura mutongo avo wekuti votongwa vachibva kumba here kana kuti kwete na11 mangwanani wemusi weChishanu.
Gweta raVaSibanda, VaAleck Muchadehama vanova nhengo yesangano remagweta reZimbabwe Lawyers For Human Rights vati nyaya dzekusungwa kwevanopikisa nevarwiri vekodzero dzevanhu dziri kuramba dzichiwedzera munyika. Asi vati zviri kuitwa kutyora bumbiro remitemo nekuti kuratidzira murunyararo ikodzero iri mubumbiro remitemo.
Your browser doesn’t support HTML5
Hurukuro Na Va Aleck Muchadehama
Studio 7 haina kukwanisa kubata mutauriri wemapurisa Assistant Commissioner Paul Nyathi sezvo vanga vasingadairi nharembozha yavo.
Asi vachitaura nevatori venhau muHarare mushure memusangano we SADC mutauriri weZANU PF, VaChristopher Mutsvangwa, vakapembedza kusungwa kwakaitwa vanopikisa nevaida kuratidzira vachiti vaida kukanganisa musangano weSADC.
Mukuru muhofisi yekufambiswa kwemashoko muZANU PF, VaFarai Marapira vaudzawo Studio 7 kuti hakuna mutemo wakagadzirirwa vanopikisa vachiti munhu anomira nemhosva yake.
Your browser doesn’t support HTML5
Hurukuro Na VaFarai Marapira
Asi United Nations, masangangano anorwira kodzero dzevanhu munyika nekunze ari kushora nyaya yekusungwa kwevanhu iyi.