Bato riri kutonga muMozambique reFRELIMO ndiro rakunda musarudzo dzakaitwa musi wa 9 Gumiguru. Vange vachimiririra bato reFRELIMO musarudzo yemutungamiri wenyika VaDaniel Chapo vanonzi vawana zvikamu zvinodarika makumi manomwe kubva muzana kana kuti 70% zvemavhoti.
VaVenancio Mondlane vaikwikwidza vakazvimirira asi vachitsigirwa nebato rinopikisa rePEDEMOS vakawana mavhoti zvikamu makumi maviri kubva muzana kana kuti 20%.
VaVenâncio Mondlane
VaChapo vave kutora chigaro chekutungamira kubva kuna VaFilipe Nyusi avo vasisakwanise kukwikwidza sezvo vasvitsa makore gumi akatarwa mubumbiro remitemo.
VaSamora Machel, mutungamiri wekutanga weMozambique
VaChapo ndivo mutungamiri wenyika wechishanu weMozambique kubva zvayawana kuzvitonga kuzere kubva kuPortugal muna 1975. Vakatungamira nyika iyi ndiVaSamora Machel, VaJoaquim Chissano, VaArmando Guebuza uye VaFilipe Nyusi.
VaFilipe Nyusi
Musarudzo dzedare reparamende, bato reFRELIOM rave nezvigaro zana nemakumi mapfumbamwe nemashanu (195) pazvigaro mazana maviri nemakumi mashanu (250). FRELIMO yange iine zvigaro zana nemakumi masere nemana (184) musarudzo dzadarika.
Sangano remubatanidzwa wenyika dzekumawirira reEuropean Union rakaburitsa mashoko kuvatori venhau richiti sarudzo idzi dzakabirirwa uye mamwe matunhu aichinja kuvhota kwainge kwaita vanhu. Asi hurumende yemozambique iri kuramba kuti sarudzo dzakabirirwa.
Zvinhu zvinonzi hazvina kugadzikana muguta guru reMaputo pachityirwa kuti panogona kuita mhirizhonga sezvo vanopikisa vasiri kutambira zvabuda musarudzo. SADC yakatoburitsa mashoko ichikurudzira runyararo muMozambique.
Vanopikisa vachiratidzira muMozambique
Asi mutungamiri wenyika vari sachigaro weSADC VaEmmerson Mnangagwa vanove sachigaro weSADC vari kushorwa nevamwe sezvo vari kunzi vakakurumidza kumedza kutsenga kuchada apo vakakorokotedza VaChapo zvainge zvabuda musarudzo zvisati zvaziviswa.
VaMnangagwa vakataura nemusi weChipiri pamusangano webato ravo wePolitburo kuti, “Ndinoda kukorokotedza vebato ratinodyidzana naro reFRELIMO nevamirira kutoreswa mhiko yekutungamira Cde Daniel Chapo, nevanhu vemuMozambique nekukunda zvine mutsindo musarudzo dzichangobva mukuitwa.”
Asi vachitaura neStudio 7, mukuru muhofisi yezvekuburitswa kwemashoko mubato reZanu-PF VaFarai Marapira vati VaMnangagwa vaikorokotedza FRELIMO nekukunda musarudzo dzevakavhota muZimbabwe chete kwete nyika iyi yose.
Your browser doesn’t support HTML5
Hurukuro naVaFarai Marapira
Nyanzvi munyaya dzezvematongerwo enyika Muzvinafundo Ricky Mukonza vati VaMnangagwa sasachigaro weSADC visafanira kutoora divi uye zvavakaita zvinopa kuti vanhu vashaye chivimbo nesangano iri.
Your browser doesn’t support HTML5
Hurukuro naMuzvinafundo Ricky Mukonza