Mapato makuru anopikisa muBotswana anoti reUmbrella for Democratic Change kana kuti UDC nereBotswana Congress Party kana kuti BCP anoti acharatidzira pamuzinda weZimbabwe muGaborone nemusi weMugovera achigunun’unira nekwaanoti kupindira kwehurumende yeZimbabwe mukuronga kubirirwa kwesarudzo dzemunyika iyi dziri kuitwa musi weChitatu svondo rinouya.
Vanoona nezvekufambiswa kwemashoko mubato reUmbrella for Democratic Change kana kuti UDC VaMoeti Mohwasa vati vatora danho rekunoratidzira pamuzinda weZimbabwe muGaborone vachiti havasi kufara nekwavanoti kushnda kwekomisheni inoona nezvesarudzo munyika iyi yeIndependent Electoral Commision kana kuti IEC neZimbabwe Electoral Commission kana kuti ZEC mukuda kubirira sarudzo.
Vanopikisa vanoti havasi kufara kuti mapepa ekuvhotera kana kuti ballot papers akaita mashoma nemusi weMugoversa svondo rapera paivhota vamwe vashandi vehurumende kusanganisira mapurisa, vanovhotesa nevamwe vasingakwabise kuvhota musi wesarudzo. Izvi vanoti ndizvo chaizvo zvakaitika muZimbabwe musi wekuvhota gore rapera.
Vachitsinhira mashoko aVaMohwasa, mutungamiri werimwe remapato anopikisa reBotswana Congress Party kana kuti BCP, VaDumelang Saleshando vaudza Studio7 kuti kusatora matanho akafanana nekuratidzira kungapa IEC simba rekubirira sarudzo ichibatsirwa neZEC.
Mukutanga kwegore rino, sangano reIEC muBotswana rakaenda kunodzidza mafambisirwo anoitwa sarudzo nesangano reZEC kunyangwe hazvo gungano renyika dziri kuchamhembe kweAfrica reSouthern African Development Community kana kuti SADC ranga rati sarudzo dzakaitwa muZimbabwe munaNyamavhuvhu wegore rakapera dzanga dzisina kuchena.
Vaimbova muturungamiri wenyika yeBotswana VaSeretse Khama Ian Khama vave mukuru webato rinopikisa reBotswana Patriotic Front kana kuti BPF vakatiwo kune zvizvarwa zveZimbabwe zvinotsigira ZANU PF zvakanyoreswa zvisiri pamutemo kuti zvikwanise kuvhota muBotswana.
Vachirambawo mashoko ekuti kune kubiridzirwa kwesarudzo kwarongwa, vanoona nezvekuburitswa kwemashoko musangano reIndependent Electoral Commission kana kuti IEC muBotswana, VaOsupile Maroba vati zviri kutaurwa nevemapato anopikisa munyika iyi hazvina maturo.
Studio7 haina kunzwa divi reZEC sezvo mutevedzeri wasachigaro wesangano iri, VaRodney Kiwa vanga vasingadaire nharembozha yavo uye havana kupindura mibvunzo yavatumirwa paWhatsapp kusvika taenda pamhepo.
Asi mukuru anoona nezvesarudzo muZEC vakamboudza vatori venhau kuti Botswana yaida kudzidza nezvemabatirwo esarudzo uye kushandiswa kweradio nemamwe madandemutande. Vakati kunyangwe vamwe vachishora ZEC, zvakaitwa neBotswana zvakaratidza kuti vane chivimbo nesangano ravo.
Mumashoko kuvatori venhau, munyori mukuru mubazi rezvekuburitswa kwemashoko VaNick Mangwana vakati Zimbabwe haipindire munyaya dzezvematongerwo edzimwe nyika vachiti hurumende inoshanda nebato chero ripi rinenge rasarudzwa zviri pamutemo.
Vakati Zimbabwe inoshanda pasi peSADC musarudzo dzinoitwa mudunhu kana kuti inoshanda nemapato ainodyidzana nawo. Asi vanoti zvekuti Zimbabwe ndiyo inobva yaita kuti rimwe bato rikunde kana kudyiwa ndezvemugotsi matsuro.
Taedza kubatawo mumiriri weZimbabwe muBotswana, VaBatiraishe Mukonoweshuro asi takundikana sezvo zvanzi vari pazororo kusvika pakati pemwedzi unouya uye ndiwo voga vanzi vane mvumo yekutaura nevatori venhau pamuzinda uyu.
Asi mukuru anoona nezvekuburitswa kwemashoko muZANU PF, VaFarai Marapira vati hushamwari hwebato ravo neBDP ndehwebhande nebhurugwa asi hapana hurongwa hwekubira sarudzo vachiti zviri kutaurwa nevanopikisa chiratidzo chekuti vapererwa nemazano.
VaMarapira vati vanoshanda nemasangano akarwa hondo yerusungunuko seFRELIMO.
Haisi Botswana chete iri kuchema chema kuti Zimbabwe iri kupindira musarudzo dzayo, vanopikisaa muSouth Africa, Mozambique neNamibia vari kushorawo hurumende nebato reZanu-PF vachiti vari kubatsira mukubirirwa kwesarudzo munyika idzi. Asi mapato airi kutonga munyika idzi anoti aya manyepo.
Your browser doesn’t support HTML5
Nyaya Ina Shingirai Madondo