Mashoko anotevera anoratidza maonero ehurumende yeAmerica pane zviri kuitika muColombia.
IZWI: Mwedzi unouya unocherechedza makore masere kubva zvasainirwa chibvumirano cherunyararo cheColombia Peace Accord chakapedza makore makumi mashanu nemana ekunetsana pakati pehurumende yeColombia nebato reRevolutionary Armed Forces of Colombia, kana kuti FARC.
Mutevedzeri wemumiriri weAmerica kuUnited Nations, Amai Dorothy Shea, vakati, “Chibvumirano cherunyararo ichi chinogadzirisa kusawirirana kwakakonzerwa nekurwisana pamwe nekushungurudzwa kwakaitika munguva inodarika makore makumi mashanu.”
Vakati “Kunyange hazvo paine kubudirira, Colombia inoramba ichisangana nezvimhingamipinyi zvenguva ndefu zvakakonzerwa nekusawirirana uku.”
Vakati “Kuzadziswa zvizere kwechibvumirano cha 2016 ndiwo musimboti weColombia wekugadzirisa matambudziko nekuwana runyararo rwunogara kwenguva ndefu.”
Amai Shea vakati, “Kubudirira kwechinangwa ichi kunoreva kukasika kuedza kuzadzisa nekuwanisa kururamiswa kune vakashungurudzwa nevakapona mukurwisana uku, kusanganisira vakapona mukushungurudzwa zvepabonde.
"Kana matanho aya asipo, Colombia icharamba ichitarisana nezvimhingamipinyi zvairi kusangana nazvo zvakaita sekusachengetedzeka, kusagadzikana nezvinangwa zvayo zvekurwisana nezvinodhaka.”
Colombia iri kugadzira hurongwa hwekukasika kutirimuka hunoda kusanganisa zvirongwa zvebudiriro, nezvinopa mukana wemabhizimusi nemabasa kune veruzhinji, kuwedzera simba mukuzadzisa chibvumirano cherunyararo.
Ambassador Shea vakaudza United Nations Security Council mazuva mashoma adarika kuti, “vari kutambira hurongwa hwekuedza kumutsiridzwa kwekuzadziswa kwechibvumirano chekupedzisira ichi.”
Vakati “America yagara inotsigira hurongwa hwe Colombia hwekuedza kuisa budiriro kumaruwa, hunove humwe hwehurongwa huzere hune zvimhingamipinyi, asi hwakakosha, hwechibvumirano cherunyararo.
"Kuti hurongwa hwe Comprehensive Rural Reform huenderere mberi uye kuve nenharaunda dzine zvose, dzinozviriritira uye dzine runyararo muColombia yose, zvakawanda zvinofanirwa kuitwa – kunyanya, kutambanudza kodzero dzekuti vanhu vave nekodzero kuivhu nekurima kune hungwaru mukushanduka kwemamiriro ekunze, kuwanisa mari zviri nyore kumadzimai, vechidiki, nevanosarurwa nekuda kweruvara rwavo, rudzi, kana nekuti ndivo zvidziva zvemunzvimbo,” vakadaro Amai Shea.
Ambassador Shea vakati zviri pachena kuti panofanirwa kutorwa matanho ekuchengetedza vanochengetedza kodzero dzevanhu, vatungamiri vemasangano akazvimirira, nevaimbove varwi.
Sekudaro, vakati kuenderera mberi kwekushungurudzwa kwevanorwira kodzero dzevanhu nevatungamiri vemasangano akazvimirira kunotambudza zvakanyanya.
Vakati nharaunda dzemarudzi evashoma dziri kuenderera mberi dzichikanganiswa nemhirizhonga.
“Zvakakosha kuti hurumende ye Colombia ichengetedze kuzvipira kwayo kuchengetedza vechi Afro-Colombian nemamwe marudzi pasi pemutemo unochengetedza vemarudzi evashoma, we Ethnic Chapter.
"Senyika inotsigira chibvumirano cherunyararo che Ethnic Chapter of Peace Accord, America inokurudzira budiriro yakakura nekuzadziswa kwechibvumirano ichi.”
Ambassador Shea vakati mumakore masere kubva paitwa chibvumirano chekupedzisira che Final Agreement, kuenderera mberi kwekuzadziswa kwechibvumirano cherunyararo ichi kunoramba kwakakosha.
“Kuti runyararo rwuvepo kuvanhu vemu Colombia vose, kunyanya kunharaunda dzevanhuwo zvavo nedzine marudzi akatarisana nenjodzi, evanhu vechi Indigenous and Afro-Colombian, chibvumirano ichi chinofanirwa kuramba chichitungamidzwa mberi.”
Ayo anga ari mashoko anoratidza maonero ehurumende yeAmerica pane zviri kuitika mu Colombia amaverengerwa neni Jonga Kandemiiri we VOA Studio 7.
Your browser doesn’t support HTML5
Nyaya inoratidza maonero ehurumende yeAmerica muchiipiwa naJonga Kandemiiri