World Food Program (WFP) inoti kusvika pari zvino yawana mamiriyoni makumi mashanu (US$50million) pamamiriyoni mazana maviri nerimwe (US$201) emari yainoda kubatsira vane nzara muZimbabwe.
Izvi zvazivisa nemukuru weWFP muZimbabwe, Amai Barbra Clemens, apo vaisanirana chibvumirano nemumiriri weJapan muZimbabwe VaYamanaka Shinichi chekuti nyika iyi ibatsire varimi vekumaruwa nemamiriyoni mashanu nezviru mazana maviri zvemadhora (US$5.2 million).
Mari iyi ichashandiswa mukuwnisa varimi mvura yemadiridziro, kurima zvirimwa zvisingadi mvura yakawanda pamwe nekudzidzisa nekukwenenzvera ruzivo rwemadhumeni.
Amai Clemens vanoti kusanaya zvakanakana kwemvura kwapa kuti vanhu vakawanda vade kubatsirwa nezvekudya. Vati, “Tichabatsira vanhu nechikafu paUS$57 million yatawana uye tichabatsirawo hurumende kuendesa chikafu kunzvimbo dzese dzine nzara”
VaShinichi vati mari yavapa kuWFP ichabatsira vanhu zviuru makumi matatu nezvinonomwe nemazana mashanu mumawadhi gumi nemashanu kuMasvingo , Manicaland neMash Central.
Vatiwo varimi, “Makambani ekuJapan achabatsira varimi vemuZimbabwe kutengesa runinga kuJapan pamwe nepasi rese kuti vawane pundutso pakurima kwavo”
Munyori mukuru bazi rezvekurima Muzvinafundo Obert Jiri vatendawo Japan nekuramba ichitsigira Zimbabwe vachiti rubatsiro rwemari yavapihwa nhasi rwakakosha pakuburitsa vana veZimbabwe munzara.
Hurumende yeZimbabwe inoti vanhu vanodariaka mamiriyoni mapfumbamwe vakatarisana nenzara.
Vari kumamisha vari kuchema chemawo kuti zvipfuyo zvavo zvakaita semombe zvave kufa nekushaya mvura nesora rekufura.
Muna Kurume, United Nations nemapoka ayo ese muZimbabwe yakazivisa kuti yainge yave kutsvaga mari inodarika mazana mana kana kuti US$430 million yekubatsira vanhu nechikafu uye WFP inoti pamari iyi iyo yaida US$201 million.
Mutungamiriri wenyika, VaEmmersom Mnangagwa vakaparura chikumbiro cheUS$3.3 Billion yekutenga chikafu pamwe nekutsigira mabasa ekurima.
Kuwana mari yekubatsira vanhu vakatarisana nenzara pasi pose kuri kunetsa zvawedzera nehondo dziri kuMIddle East, kuUkraine, Sudan nedzimwe nzvimbo.
United Nations inoti vanhu mamiriyoni mazana maviri nemakumi masere nemaviri kana kuti 282 million munyika makumi mashanu nepfumbamwe vakatarisana nenzara pasi rose.
Your browser doesn’t support HTML5
Nyaya Ina Godwin Mangudya