Bazi rinowona nezvemamiriro ekunze re Meteorological Services Department, razivisawo kuti dutumupengo Cyclone Chido rasvika munyika nhasi asi range risisina hukasha sehwarakange rinahwo apo rakapinda kune dzimwe nyika uko rinonzi rakatora hupenyu hwevanhu pamwe nekuparadza zvivakwa, migwagwa nezvimwe.
Bazi iri rinoti dutumupengo iri ratanga kusvika munzvimbo dzakadayi seMurehwa, Nyamapanda Mutoko kuMashonaland East.
Vanowona nezvemamiriro ekunze musangano iri, VaBaba Maketa vanoti nekuda kwedutumupengo iri mvura yanaya zvikuru munzvimbo zhinji dzenyika asi vanga vasati vanzwa kana kune dzimwe nzvimbo dzatarisana nehukasha hwavakange vakagadzirira.
"Mvura yanaya munzvimbo zhinji munyika asi yange isina hukasha kwatange tichitarisira sehwakawonekwa kudzimwe nyika," VaMaketa vaudza Studio7.
Your browser doesn’t support HTML5
Hurukuro naVaBaba Maketa