America yakurudzira hurumende ye Azerbaijan kuti iburitse muhusungwa nekukasika vakaipandukira vakawanda, varwiri vekodzero dzevanhu, nevatori venhau vakanga vachisungwa nenyaya dzavo dzekurwira kodzero dzevanhu nerusununguko rwavanopiwa nebumbiro remitemo.
Mugwaro richangobva kuburitswa, gurukota rezvekudyidzana nedzimwe nyika muAmerica, VaAntony Blinken vakakurudzira Azerbaijan kuti iburitse nekukasika Rufat Safarov, Sevinj Vagifgizi, Azer Gasimli, Farid Mehralizada, Bakhtiyar Hajiyev, na Gubad Ibadoghlu, pamwechete nevashandi venhepfenyuro yakazvimirira yeMyedan TV vachangobva mukusungwa, nevamwe vakawanda vakasungirwa basa ravo munyaya dzekodzero dzevanhu.
VaBlinken vakati “America inoshushikana zvakanyanya, kwete nekusungwa uku chete, asi nekukwira kuri kuita kusungwa kwevemasangano akazvimirira nevatori venhau mu Azerbijan.”
Zvekuti kusungwa kwevanhu mu Azerbaijan kuri kukwira zvinotyisa.
Gwaro riri pamusoro pekutyorwa kwekodzero dzevanhu muAzerbaijan richangobva kuburitswa nebazi rezvekudyidzana nedzimwe nyika muAmerica, iro raitarisa mamiriro enyaya dzekodzero dzevanhu muAzerbaijan muna 2023, rakaburitsa pachena kuti “mubatanidzwa wemasangano akazvimirira unofungidzira kuti kwaive nevasungwa vezvematongerwo enyika nevanhu vakachengetedzwa vasati vatongwa vangangosvika kumazana maviri nemakumi mashanu nevana, 254, kusvika muna Zvita 2023.
Vasungwa vezvematongerwo enyika nevamwe vakachengetedzwa vasati vatongwa vanosanganisira Muzvinafundo ari murwisi wehuwori, varwiri vehutongo hwejekerere nevarwiri vekodzero dzevanhu, vatori venhau, vemapato anopikisa, nevezvitendero.”
Vaviri vevasungwa vakamirira kutongwa vane mazita akataurwa naVaBlinken vakasarudzwa kuti vapiwe mibairo nebazi rezvekudyidzana nedzimwe nyika muAmerica mwedzi uno nekuda kwekurwira kodzero dzevanhu nekurwisana nehuwori.
Rufat Safarov ndemumwe wevakatanga sangano rinounganidza zviitiko zvekusungwa kune chekuita nezvematongerwo enyika, kutongwa, nehuwori muhurumende reDefense Line.
Mazuva mashoma asati auya kuno kuAmerica kunogamuchira mubairo unopiwa negurukota rezvekudyidzana nedzimwe nyika kune vanorwira kodzero dzevanhu, weHuman Rights Defenders Award, Rufat Safarov akasungwa nekuchengetedzwa muhusungwa asati atongwa.
Sevini Vagifgizi mupepeti mukuru wenhau kuAbza Media, sangano renhau rakazvimirira rinoburitsa nyaya dzehuwori, iro rakaburitsa nyaya dzine chekuita nevakuru muhurumende. “Basa rake,” sezvakataurwa naVaBlinken, “rakatsamwisa mapurisa.”
Muzvare Vagifgizi vanga vari muhusungwa vasati vatongwa kubva muna Mbudzi 2023. Musi waZvita 9, vakawana mubairo unopiwa negurukota rezvekudyidzana nedzimwe nyika muAmerica kune vanorwisana nehuwori, we2024 Anti-Corruption Champion’s Award iye asipo.
VaBlinken vakati “Tinokurudzoira hurumende yeAzerbaijan kuti iburitse avo vakachengetedzwa muhusungwa zvisina tsarukano nezvikonzero zvekurwira kodzero dzevanhu, yomisa kushungurudza vemasangano akazvimirira, yoremekedza rusununguko rwunopiwa nekodzero dzevanhu kumunhu wese, nekuzadzisa kuzvipira kwayakaita payakapinda musangano reOrganization for Security and Cooperation mu Europe.”
Ayo anga ari mashoko anoratidza maonero ehurumende yeAmerica andakuverengerai.