Mutungamiri weAmerica VaJoe Biden neMuvhuro varerutsa mitongo yerufu yakapihwa vasungwa vanosvika makumi matatu nevanomwe pavasungwa makumi mana vari mumajeri ehurumende (federal prisoners) vachipa chikonzero chekushoropodza kwavagara vachiita mutongo werufu.
Danho ravo iri ranyimawo mukana kuhurumende yaVaDonald Trump iri kuuya wekuti isabvumidze kuurayiwa kwevasungwa ava.
Munguva yehurumende yaVaTrump yekutanga vasungwa gumi nevatatu vakanga vakatongerwa rufu vakaurayiwa, huwandu hwakanyanyisa munhoroondo yemakore mana anotonga mutungamiri wenyika.
Varume makumi matatu nevanomwe varerutsirwa mitongo ava vakatongerwa rufu mushure mekuwanikwa nevatongi vaine mhosva dzekuuraya zvine utsinye. Vazhinji vevarume ava vanga vakamirira kuzadziswa kwemitongo yavo kwemakore anodarika gumi.
Nyanzvi munyaya dzezve matongerwo enyika uye vachidzidzisa paDevry University kuOhio, Professor Elliot Masocha, vanoti danho riri kutorwa naVaBiden rakanaka uye rinopa chiremera pahutongi hwavo.
Vanoti kunyange hazvo VaTrump vakasafarira danho iri, havana zvizhinji zvavanokwanisa kuita pane zvaitwa naVaBiden pamutemo.
"Zviri kuda kuitwa naVaBiden izvi rinoratidza kuti vanoda kuti nhorowondo yehutongi hwavo iwane chiremerera uye zvinoratidza kuti vanoda kuratidza masimba avo kusvika pachatora VaTrump matomhu mwedzi uno uya," Muzvinafundo Masocha vaudza Studio7.
Varume ava vachagara mujeri kwehupenyu hwavo hwese vasina mukana wekuregererwa.
Your browser doesn’t support HTML5
Hurukuro naMuzvinafundo Elliot Masocha