Rimwe remasangano anomiririra vashandi munyika, reZimbabwe Congress of Trade Unions, (ZCTU) rinoti hurumende haina kuitira zvakanaka kumushandi mugore ra2024.
Vashandi vanoti gore iri ranga rakavaomera zvikuru sezvo vakasangana nematambudziko makukutu mune zvakawanda muhupenyu hwavo.
Mutsamba yayo kuvashandi panguva yezororo reKisimusi neGoredzva, ZCTU inoti yakazvipira kutora matanho akakodzera anounza pundutso kumushandi mugore ra2025.
Hatina kukwanisa kunzwa divi rehurumende sezvo tatadza kubata gurukota rezvevashandi, VaJuly Moyo, avo vanga vasiri kudaira nharembozha yavo.
Asi vakafanobata chigaro chemunyori mukuru weZCTU, VaKudakwashe Munengiwa, vanoti yakwana nguva yekuti vana vemuZimbabwe vafarewo vari munyika yavo vaine zvikwanisiro zvavanoda.
Vanoti gore rinouya vachaita chese chavanogona kuti hupenyu hwemushandi hwuve huri nani.
Your browser doesn’t support HTML5
Hurukuro naVaKudakwashe Munengiwa