Mhirizhonga inonzi iri kuramba ichienderera mberi kuMozambique pamberi pekugadzwa kwaVaDaniel Chapo semutungamiri wenyika mangwana.
Rimwe sangano rinoongorora mafambisirwo esarudzo reDecide Electoral Platform, rinoti nezuro kwakapfurwa vanhu vatanhatu uye kukakuvara vamwe gumi nevashanu mukuratidzira kuri kuitwa nevanopikisa.
Vanotiwo vanhu vafa mumhirizhonga iyi kubva paitwa sarudzo gore rakapera kusvika parizvino vadarika mazana matatu .
Musi wa 5 Ndira mumusangano wakaitwa ne sangano re mSADC wekuzeya mamiriro akaita zvinhu mu Mozambique, chikwata che SADC Panel of Elders, chichitsigirwa neTroika chakapiwa basa rekuyananisa mapato ari kupesana mu mMozambique kuti muve nerunyararo.
Hatisati tanzwa pamire nhaurirano idzi asi mashoko eSADC anoti chikwata ichi chichaenda ku Mozambique mushure mekugadzwa kwa VaChapo mangwana. Zvichakadaro gurukota rezvekudzivirirwa kwenyika Amai Oppah Muchinguri-Kashiri vakaenda kuMozambique nezuro kumabiko ekugadzwa kwa VaChapo senhume yakamirira mutungamiri wenyika va Emmerson Mnangagwa avo vachiri pazororo ravo repagore.
Chimwe chizvarwa che Zimbabwe chinogara kuMozambique VaTanaka Muchemwa vanoti zvinhu hazvina kumira zvakanaka munyika iyi.
Vanoti vari kukurudzira vamwe vavo vekuZimbabwe kuti vagare mudzimba uye kuti vasaende kumagungano evari kuratidzira kana ezvematongerwo enyika.
Your browser doesn’t support HTML5
Hurukuro naVa Tanaka Muchemwa