Mutori wenhau Blessed Mhlanga wekambani yeAlpha Media Holdings inotsikisa mapepanhau eNewsday, Standard neZimbabwe Independent Ute nepfenyuro yeHeart and Soul TV ari kutarisirwa kumira pamberi pedare repamusoro reHigh Court neMuvhuro.
Gweta rake, VaChris Mhike vaudza Studio 7 kuti dare repamusoro rakatambira mapepa echikumbiro chake chekuti atongwe achibva kumba.
Dare ramejastiriti rakaramba kumupa mukana wekubvisa mari yechibatiso. Blessed ari kupomerwa mhosva yekupesvedzera mhirizhonga apo akataura nemurwi wehondo yerusungunuko VaBlessed Geza vari kuti mutungamiri wenyika VaEmmerson Mnangagwa vakundikana kutungamira nekudaro ngavasiye basa.
Asi Blessed ari kuramba mhosva yaari kupomerwa iyi. Mutori wenhau uyu akasungwa musi wa24 Kukadzi.
Masangano evatori venhau munyika nekunze ari kushora kusungwa kwaBlessed zvakanyanya.
Your browser doesn’t support HTML5
Hurukuro naVaChris Mhike