Mutungamiri weAmerica, VaDonald Trump, vebato reRepublican Party, naVaJoe Biden, vachamirira bato reDemoctratic Party musarudzo yemutungamiri wenyika, vaita misangano vachipindura mibvunzo yevanhu vari mumatunhu akasiyanasiyana.
VaTrump vaita musangano wavo, kana kuti Townhall, kudunhu reFlorida, ukuwo VaBiden vachiitawo wavo vari mudunhu rePennyslavania.
VaTrump naVaBiden vachakwikwidzana musarudzo yemutungamiri weAmerica ichaitwa nemusi wa 3 Mbudzi gore rino.
Nyaya yanyanya kutaurwa pamusoro payo pamisangano miviri iyi ndeye chirwere cheCovid-19 nemabatirwo achakaitwa nehurumende yaVaTrump. VaTrump varumbidza basa ravaita kusvika pari zvino uye mamiriro akaita zvinhu munyika, asi VaBiden varatidza kuve nedzimwe pfungwa panyaya iyi.
VaTrump vasvika padyo nekubvuma kuti vane zvikwereti zvinoita mamiriyoni mazana mana emadhora, nyaya yakazara mumapepanhau uye yavasingafariri kutaura nezvayo.
Panyaya dzezvehutano, VaTrump vati chirongwa chekubatsira vanhu kana varwara, chinonzi Obamacare, vachachibvisa vagoisa chavo chavanoti chiri nani asi havana chavataura kuratidza kuti izvi zvichaitika sezvo vave nemakore vachitaura izvi.
Panguva iyo chirwere cheCovid-19 chave kubata vanhu vakawanda zvekare muAmerica, VaTrump vati nhomba yekudzivirira kutapurira chirwere ichi wave padyo.
Your browser doesn’t support HTML5
VaTrump Vachitaura
Izvi zvinorambwa navanamazvikokota avo vanoti mushonga wekurapa coronavirus uchiri kure uye zvehupfumi hazvina kumira zvakanaka sezvo mamiriyoni mazhinji evanhu akarasikirwa nemabasa avo, uye makambani mazhinji akatovharwa zvekuti haachakwanisi kudzoka.
VaBiden vanoti zvinhu hazvina kumira zvakanaka sezvo dambudziko guru renyika riri rekushaya hutungamiri.
Your browser doesn’t support HTML5
VaJoe Biden Vachitaura
Kweawa yose, VaTrump havana kupindura zvakakwana, mibvunzo yavange vachibvunzwa kubva panyaya yekushandisa mamasiki, kukurudzira masangano anoda zverusarura, nezvavanoda kuunza kana vabvisa Obamacare.
VaBiden vavimbisa kupa pfungwa yavo pamusoro pekuwedzera huwandu hwemajaji edare guru, reSupreme Court, kana vakakunda musarudzo.
Muzvinafundo Elliot Masocha, vepa DeVry University, avo vange vakatarisa nekuterera vaviri ava vachipindura mibvunzo, vanoti hapana chitsva chabuda kana chataurwa, vachiti chanyanya kuonekwa kusiyana kwevarume vaviri ava mupfungwa nemaitiro avo.
VaMasocha vati VaBiden vakwanisa kuudza vanhu zvavanoda kuzovaitira kana vakakunda musarudzo asi VaTrump vapedza nguva vachingozvirumbidza pachinhambo chekuudza vanhu kuti sei vachida kupiwa mamwe makore mana ekutonga.
VaMasocha vati VaTrump vatambisa mukana wekukurudzira vanhu kuti vashandise mamasiki sezvo ivo vakambobatwavo nechirwere ichi uye apo huwandu hwevanhu vari kubatwa nechirwere ichi munyika huchiramba huchikwira.
Your browser doesn’t support HTML5
Hurukuro naMuzvinafundo Elliot Masocha