Zvichitevera bongozozo rakaitika paparamende yeAmerica, kana kuti Capitol Hill, nemusi weChitatu apo pakafa vanhu vana, nhengo zhinji dze Democtratic Party dziri kukurudzira kuti mutungamiri wenyika, VaDonald Trump, vabve kana kubviswa pachigaro.
Mutauriri weParamende, Amai Nancy Pelosi, vakaudza vatori venhau nezuro masikati kuti mutevedzeri waVaTrump, VaMike Pence, vaunganidze makurukota ehurumende kuti vabvumirane kubvisa VaTrump pachigaro, vachishandisa mutemo weAmerica, we 25th Amendment, uyo unoratidza nekutsanangura kubviswa pachigaro kwemutungamiri wenyika kana makurukota ehurumende yake vakabvumirana kuti mutungamiri wenyika haachakwanisi kuita basa rake sezvinotarisirwa.
Vamiriri veDemocratic Party vazhinji nezuro vakasaina gwaro rekukurudzira kubviswa kwa vatrump pachigaro.
Vanoongorora zvematongerwo enyika, Muzvinafundo Elliot Masocha, vanoti VaTrump vasarirwa nemazuva gumi nemaviri vari pachigaro, izvo zvinoreva kuti hapasisina nguva yakakwana yekushandisa mutemo uyu.
Your browser doesn’t support HTML5
Hurukuro naMuzvinafundo Elliot Masocha