Kambani yeCitigroup yakazivisa kuti ichange ichitungamirwa naAmai Jane Fraser mukutanga muna Kukadzi 2021.
Citigroup ndiyo muridzi weCitibank, bhanga guru rechina muAmerica, richitivera shure kwemabhanga e JPMorgan Chase, Bank of America, neWells Fargo.
Amai Fraser vachave mudzimai wekutanga kutungamirira bhanga guru mu America mushure mekuenda pamudyandigere kwemukuru webhabga iri, VaMichael Corbat, avo vane makore makumi matatu nemanomwe vachishandira bhanga iri.
Vanodzidzisa zvemabhizimisi paDeVry University, Muzvinafundo Elliot Masocha, vanoti zvaitwa neCitigroup chinhu chikuru uye zvinopa simba kuvanhukadzi vanoshanda mubasa iri.
Vati Amai Jane Fraser vakawana basa iri nekushanda nesimba pabhanga iri kwemakore anopfuura gumi nematanhatu.
Citibank ine vanhu vanopfuura mamirioni mazana maviri vanochengeta mari dzavo mubhanga iri, iro rinoshanda munyika dzinopfuura zana nemakumi matanhatu.
Kambani yeCitigroup ine vashandi vanoita zviuru mazana maviri nezvina.
Amai Fraser vakadzidza paHarvard University nekuCambridge University uye vave nemakore gumi nemanomwe vachishandira Citigroup.
VaMasocha vanoti kuti vapiwe basa guru iri, vakuru veCitigroup vakatarisa dzidzo, kugona basa pamwe neruzivo rwaAmai Fraser vakawana vainazvo zvese.
Your browser doesn’t support HTML5
Hurukuro naMuzvinafundo Elliot Masocha