Hurumende inoti iri kuda kubvisa mari dzinobhadharwa nevanhu muzvipatara muchido chayo chekupedza kufa kwemadzimai akazvitakura munyika.
Gurukota rezvehutano, Va Henry Madzorera, vaudza vanoti hurumende yakanga yatora chisungo ichi kare, asi chakazonyanya kusimbaradzwa kumusangano we African Union uko nyika dzemu Africa dzakabuda nechisungo chekuita zvese zvadzinogona mukuedza kupedza kufa kwana amai nevana nezvinhu zvinogona kugadziriswa.
Va Madzorera vanoti Zimbabwe ine chirongwa chekuvaka dzimba dzekuti madzimai ekumaruva vawane pekugara apo vanenge vakamirira kubatsirwa muzvipatara zviri mumatunhu ose ari munyika.
Va Madzorera vati chirongwa ichi chekuvaka dzimba idzi chakatotanga kare munzvimbo dzakaita seChivi nekuManicaland.
Zvirongwa zvekuvaka nzvimbo idzi zviri kuwana rubatsiro kubva kunyika dzakazvipira kubatsira Zimbabwe munyaya dzehutano