Sachigaro weboka rinomirira vashandi vehurumende pamwe naiyo hurumende munhaurirano dzemihoro, reNational Joint Negotiating Council, VaNelson Tozivaripi Sambureni, vanonzi vasangana nevakuru muhurumende vakavimbiswa kuti hurumende yazvipira kutarisa zvichemo zvevashandi.
Musangano uyu wabudawo nechisungo chekuti hurumende, kuburikidza nekomiti inoona nezvemari dzevashandi vehurumende, ichasangana nevamiriri vevashandi pamwe nevari kumirira hurumende muhurukuro dzemihoro svondo rinouya neChipiri kuti vaedze kupedza gakava remari iro rakasvitsa vashandi kupinda mukuramwa mabasa.
Komiti iyi inonzi inotungamirwa nemutevedzeri wemutungamiri wehurumende, VaArthur Mutambara.
Vatungamiri vevashandi vanga vakaronga kuramwa zvekudya pamwe nekurara kumahofisi ehurumende kutanga neChitatu svondo rino, kusvika zvavari kuda zvatambirwa nehurumende.
Sachigaro weApex Council, Amai Tendai Chikowore, vaudza Studio7 kuti vachambomira kuramwa mabasa kusvika vaona zvichabuda mumusangano uchaitwa neChipiri uyu.
Mutungamiri wesangano revarairidzi reProgressive Teachers Union of Zimbabwe, PTUZ, VaTakavafira Zhou, vatiwo sangano ravo harina chivimbo chakanyanya nemusangano weChipiri uyu, asi vati vachambotevera zvarongwa nevamwe vavo, vachimirira kuona kunowira tsvimbo nedohwe.
