Sangano rinomirira magweta munyika, reLaw Society of Zimbabwe, rinoti rine tarisiro yekuti kusarudzwa kwevanozoitwa vatongi vedare repamusoro reHigh Court kuchafambiswa zvakanaka uye zviri pachena.
Judicial Services Commission kana kuti JSC yakabudisa mazita evanhu vanopfuura makumi matatu vaychabvunzurudza kana vachikodzera kuve vatongi kubva musi wa 26 kusvika musi wa 28 Chikunguru.
Mutungamiri weLaw Society of Zimbabwe, VaWellington Magaya, vaudza Studio 7 kuti mazita evanenge vabudirira aanoendeswa kumutangamiri wenyika VaEmmerson Mnangagwa vane shoko rekupedzisira vachishanda neJSC.
VaMagaya vati nyaya yekodzero dzevanhu chinhu chikuru muZimbabwe naizvozvo vachasarudzwa ava vanofanirwa kuve vanhu vanokudza kodzero dzevanhu. Vatiwo vachasarudzwa ava vanofanirwa kuve vanhu vasina bato ravakarerekera munyaya dzezvematongerwo enyika.
VaMagaya vati sangano ravo richaferefeta vanhu vari kubvunzurudzwa ava roendesa zvarinenge rawana kuJ kuti komishini iyi igoona zvekuita.
Vatiwo Zimbabwe iri kunetseka nenyaya yehuori, naizvozvo vachabvunzurudzwa ava havafanire kunge vaine maoko akasviba.
Your browser doesn’t support HTML5
Hurukuro naVaWellington Magaya