Musangano wanga wakarongwa pakati pehurumende nevamiriri vevashandi, uyo wanga uchifanira kuitwa muHarare, unonzi hauna kuzobudirira mushure mekunge hurumende yakumbira nguva yekuti igadzirire.
NeChishanu svondo rapera, hurumende inonzi yakanyorera sangano reApex Council tsamba, ichikumbira kuti musangano uyu uendeswe mberi nesvondo rimwe chete, kumusi wa23 mwedzi uno, ichiti inoda nguva yekuti igadzirire.
Munyori mukuru wePublic Service Association, PSA, VaEmmanuel Tichareva vaudza Studio 7 kuti kunyange hazvo vari kunyunyuta, vatambira chikumbiro chehurumende ichi.
Asi vanoona nezvekufambiswa kwemabasa musangano reProgressive Teachers Union of Zimbabwe, PTUZ, VaOswald Madziwa, vanoti chikumbiro chehurumende ichi kuda kungozvuva makumbo munhaurirano dzemihoro, sezvo hurumende isiri kuda kuwedzera vashandi vayo mari.
