Mutevedzeri wemutungamiriri wehurumende, Muzvare Thokozani Khupe, vanoti vari kushushikana zvikuru nekumbunyikidzwa kuri kuitwa madzimai munyika, zvikuru sei munguva yekunyorwa kwebumbiro idzva remitemo yenyika.
Muzvare Khupe vataura mashoko aya mushure mekurohwa zvakaipisisa kwemumwe mudzimai weku Epworth uyo wavakabatsira nemari yekurapwa nechikafu mushure mekunge abuda pa ZBC achikumbira rubatsiro.
Muzvare Khupe, avo vari kushanyira zvirongwa zvemadzimai kuShangaai ku China, vati vari kuedza kutaura nemapurisa nevamwe vanoona nezvemutemo munyika kuti madzimai achengetedzwe kana achinge ataura pfungwa dzavo mune zvematongerwe enyika nezvimwe zvakadaro.