Nhengo dzeparamende mu MDC inotungamirwa naVaMorgan Tsvangirai, dzinoti dziri kuda kuti dare reparamende riumbe komiti inofanirwa kuferefeta nyaya dzemhirizhonga, kubva pane yakaitika muna 2008, kusvika pamhirizhonga iri kuitika munyika izvozvi.
Mashoko aya anobuda zvichitevera mashoko ekuti mhirizhonga iri kuenderera mberi munyika.
Mapepanhau akasiyana siyana anoti kune mhunu akapisirwa imba yake kwaMurehwa, uye mhirizhonga iri kuitika mumatunhu akawanda, yava kuvhiringa chirongwa chekuregererana.
Mukokeri weMDC muparamende, VaInnocent Gonese, vanoti panofanirwa kuumbwa komiti inoongorora nyaya yemhirizhonga.
VaGonese vanoti vanhu vasina kupara mhosva hapana chavanofanirwa kutya.
Studio7 haina kunzwa divi reZanu PF panyaya yekomiti iri kukurudzirwa kuumbwa neMDC.