Nyaya yenhaurirano dzisiri kupera pakati pemapato matatu ari muhurumende, inonzi yava kutemesa veruzhinji musoro, sezvo pasina achaziva kwakananga hurumende yemubatanidzwa.
Vamwe vanofunga kuti kupinda munyika kwemuyananisi, uye vari mutungamiri weSouth Africa, VaJacob Zuma, kungangodaro kwaunza kuwirirana muhurumende, uye kupedzwa kwenhaurirano.
Asi nyanzvi munyaya dzezvematongerwo enyika, uye vari mudzidzisi paUniversity of Zimbabwe, Professor John Makumbe, vanoti kunyange hazvo VaZuma vati zvinhu zviri kufamba, havaoni Zanu PF neMDC zvichigadzirisa nyaya iripo munguva yataurwa naVaZumba.
Izvi zvinotambirwawo neimwe nyanzvi yezvematongerwo enyika, uye vari Programs Manager weCrisis in Zimbabwe Coalition, VaPedzisai Ruhanya, avo vanotiwo sezvo pakamboitika hurukuro dzakafanana naidzodzi dzakawanda dzisina kuburitsa chimuko, vanototenda dzanwa dzaswera nebenzi.