Ongororo yakaitwa mwedzi wapfura inoratidza kuti munyika mukaitwa sarudzo, bato reMDC inotungamirwa naVaMorgan Tsvangirai rinokunda, richiteverwa nebato reZanu PF, kuchizouya bato reZAPU.
Ongororo iyi yakaitwa ne Mass Public Opinion Institute pavanhu chiuru nemakumi matanhatu nevaviri vakabvunzwa. Vanhu ava vaibvunzwa kuti kana munyika mukaitwa sarudzo ndiyani wavangavhotere.
Ongororo iyi inotiwo vanhu vanokwana 32% vakati vachavhotera VaTsvangirai, 18% ikati VaMugabe, 2% bato reZAPU riri kutungamirwa naVaDumiso Dabengwa. Asi vanhu vanosvika zvikamu makumi mana kubva muzana, 40%, vakati vanogona kusavhota.
Nyanzvi munyaya dzezve matongerwo enyika, VaJoy Mabhenge, vanoti ichokwadi kuti bato raVaTsvangirai rinokunda musarudzo dzinoitwa chere nguva pari zvino.