Mutungamiri wenyika, VaRobert Mugabe, vakabatana neMuvhuro nevatungamiri venyika dzepasi rose kumusangano weUnited Nations General Assembly uri kuitirwa muNew York kuAmerica.
VaMugabe vakasvika muNew York nemusi weMugovera uye vari kufamba nemudzimai wavo, Amai Grace Mugabe, pamwe nemakurukota ehurumende akati wandeyi.
Musangano uyu uri kuzeya zvikuru chisungo chakaitwa nenyika dziri muUnited Nations muna 2000 chekudzikisa hurombo munyika dzichiri kubudirira panosvika gore ra2015 pasi pechirongwa che Millenium Development Goals.
VaMugabe vari kutarisirwa kutaurawo pamusangano uyu, uye vanonzi vachashora nyika dzakabudirira nekutemera kwadzakaita Zimbabwe zvirango.
Vachitaura neMuvhuro, munyori mukuru we Unied Nations, Va Ban Ki-moon, vakakurudzira nyika dzakabudirira kuti dzishande nesimba mukurwisa hurombo munyika dzichiri kubudirira, zvikuru dzemuAfrica.
Nyanzvi munyaya dzezvematongero enyika, Va Briggs Bomba, vanoti hapana zvitsva zvinotaurwa naVaMugabe, uye mumwe wevamwe vatungamiri vari kutadza kuzadzisa zvinodiwa neUnited Nations.