Mutungamiriri wehurumende, Va Morgan Tsvangirai, vasangana neMuvhuro negurukota rinowona nezvekunze kweAmerica, Amai Hillary Clinton, vakakurukura pamusoro pemamiriro akaita zvinhu muZimbabwe.
VaTsvangirai vakasvika mu Washington DC neSvondo mangwanani. VaTsvangirai vari kupihwa mubairo we W Averell Harriman Democracy Award nesangano reNational Democratic Institute neMuvhuro manheru.
Mubairo uyu unopihwa vanhu vanorwira kodzero dzevanhu pasi rose. Sangano re Choco Women of Columbia riri kupihwawo mubayiro uyu.
Vachitambira VaTsvangirai, Amai Clinton vati hurumende yavo iri kuenderera mberi nekutsigira hurongwa hwekuti Zimbabwe ive nehutongi hwejekerere. Amai Clinton varumbidza VaTsvangirai nekushinga kwavo mukuedza kushandura zvinhu muZimbabwe.