Gurukota rezvemari, VaTendai Biti, pamwe negurukota rezvekurongwa kwehupfumi, VaTapiwa Mashakada, vari muWashington umo vari kusangana nevakuru vehurumende yeAmerica vachiedza kugadzirisa hukama.
VaBiti vaudza Studio7 kuti chikuru chavari kuda kubva kuAmerica, imari yekuti Zimbabwe ishandise.
Vatiwo vari kuda kuti America ipote ichipa Zimbabwe mari yekushandisa sezvo Zimbabwe yakatanga kushandisa dhora reku America gore rapera, kunyange riri kunetsa kuwana.
VaBiti vati vari kusangana neChitatu nechipangamazano chemutungamiri weAmerica, VaBarack Obama, Muzvare Michelle Garvin.
Vanotiwo vachatuarawo nyaya yekuti Zimbabwe ikanganwirwe zvikwereti zvayo. Gurukota rezvemari ratiwo riri kutarisira kuti nyaya yehurumende yemubatanidzwa ichakurukurwawo nezvayo mumisangano iyi.
Nyanzvi munyaya dzezvematongerwo enyika pamwe nekudyidzana kwenyika, VaInnocent Sithole, vanoti havaoni VaBiti vachibuda nechouviri parwendo rwavo kuAmerica.