Huwandu hwevashandi vemuzvipatara kusanganisira vakoti navanachiremba vari kubayiwa nhomba yeSinopharm yakapihwa Zimbabwe neChina huchiri hushoma zvakanyanya.
Kusvika nemusi weMugovera kwange kwabayiwa nhomba vanoshanda muzvipatara zviuru gumi nezvishanu zvine mazana manomwe nevashanu kana kuti 15, 706.
Mukuru mubazi rezvehutano anoona nezvekurwisa chirwere cheCovid-19 Dr Agness Mahomva vakaudza bepanhau reSunday Mail kuti vamwe vave kutya kubaiwa nhomba nekuda kwemashoko enhema ari kutenderera pamadandemutande akasiyana siyana achikurudzira vanhu kuti vasatambire nhomba iyi.
Asi mutungamiri wesangano revakoti reZimbabwe Nurses Association VaEnoch Dongo vanoti hapana dzidziso yakakwana nezvenhomba iyi kubva kuhurumende zvopa kuti vamwe vazengurire kubayiwa nhomba.
Your browser doesn’t support HTML5
Hurukuro naVaEnoch Dongo