Chirongwa chehurumende chekubatana nevemabhazi anotakura veruzhinji vachishanda nekambani yehurumende yemabhazi yeZimbabwe United Passenger Company, ZUPCO, chinonzi chinenge chingangowondomoka zvichitevera kubuda kunonzi kwave kuita vamwe vemabhazi muhurongwa uhwu.
Mumwe ane mabhazi ake ari kushanda neZUPCO asina kuda kudomwa nezita audza Studio 7 kuti iye nevamwe vave kubuda vachisiya mabhazi mashoma sezvo hurumende isiri kuzadzisa chivimbiso chayo chekuti inovabhadhara paine nguva.
Muzvinamabhazi uyu anoti nekuda kwekuti havasi kubhadhara nehurumende mari dzavo panguva yavanenge vakadzitarisira, vave kutadza kugadzirisa mabhazi avo anenge afa achiita basa reZUPCO.
Studio 7 haina kukwanisa kunzwa kubva kuZUPCO kanawo kubazi rezvekutakurwa kwezvinhu kuti tinzwewo divi ravo panyaya iyi.
Asi mutungamiri wesangano revanofamba nedzimotokari dzeveruzhinji, rePassenger Association of Zimbabwe, VaTafadzwa Goliati vanoti veruzhinji vave kushupika zvakare sezvo vave kumanikidzwa kudzokera kumakombi ayo anovadhurira zvichienzaniswa neZUPCO.
Your browser doesn’t support HTML5
Hurukuro naVaTafadzwa Goliati