Dare repamusoro soro reConstitutional Court nemusi weChitatu svondo rinouya riri kutarisirwa kutanga kunzwa nyaya yakaturwa kudare iri nemutungamiri weMDC Alliance, VaNelson Chamisa, yekuramba kutambira zvakabuda musarudzo yemutungamiri wenyika dzemwedzi wapera.
Sangano reZimbabwe Electoral Commission rakati mutungamiri wenyika, VaEmmerson Mnangagwa, ndivo vakakunda.
Nemusi weChina magweta aVaMnangagwa neaVaChamisa akasangana nemutongi mukuru wematare, VaLuke Malaba, kuti vaone kuti nyaya iyi yotanga kuzeyiwa riinhi.
Pakawiriranwa kuti magweta VaChamisa aunze mamwe magwaro kudare nemusi weMugovera, aVaMnangagwa oita zvimwe chetezvo nemusi weMuvhuro.
Mutevedzeri wemunyori wezvemutemo mubato reZanu-PF, VaFortune Chasi, vanoti havaone dare richitsveta parutivi zvakabuda musarudzo.
Asi munyori mukuru muMDC-T inotungamirwa naVaChamisa, VaDouglas Mwonzora, vanoti nyaya yavo yakasimba uye vanotarisira kukunda.
Your browser doesn’t support HTML5
Hurukuro maVaFortune Chasi naVaDouglas Mwonzora