Mutungamiriri wenyika VaRobert Mugabe neSvondo vakakurudzira vanhu munyika kuti varege kuira zvemhirizhonga munyaya dzezve matongerwe enyika.Asi nyanzvi munyaya dzezvematongerwo enyika dzinoti mashoko aVaMugabe ndeemugotsi matsuro.
VaMugabe vakati vanhu munyika vanofanira kuisa simba ravo rose mukutsvaga kuti hupfumi hwenyika hwovandudzwa sei. VaMugabe vakataura mashoko aya apo vaipemberera makore makumi matatu Zimbabwe yawana kuzvitonga kuzere.
Nyanzvi munyaya dzezve matongerwe enyika dzinoti mashoko a VaMugabe akasiyana nezvinoitwa nevechidiki vebato ravo re Zanu-PF avo vanopomerwa mhosva yekutungamirira nyaya dzemhirizhonga munyika.
Va Pedzisai Ruhanya ndiProgrammes Manager muCrisis in Zimbabwe Coalition. Va Ruhanya vanoti VaMugabe kana vari pachokwadi vane simba rekupedza mhirizhonga munyika kasi izvi hazvionekwi zvichiitika nekuti bato ravo ndiro riri pamberi munyaya dzemhirizhonga.