Vashandi vehurumende vanoti havasati vanzwa kuhurumende panyaya yekuti inge yagadzirisa nyaya yemihoro yavo panosvika Chishanu.
Sachigaro ve Apex Council, Amai Tendayi Chikowore, vanoti vakapa hurumende kusvika musi wa 5 Kurume kuti inge yagadzirisa nyaya dzemihoro.
Vashandi vehurumende vari kuda kutambiriswa mari inotangira pamazana matanhatu nemakumi matatu emadhora pamwedzi.
Asi hurumende inoti haina mari iri kudiwa nevashandi. Amai Chikowore vanoti masangano anomirira vashandi vehurumende ari kusangana neMuvhuro svondo rinouya, voronga danho rekutora.
Pari zvino vashandi vehurumende vanonzi vari kuenda kumabasa asi vasingaite basa.
Vashandi ava vakakanda mapadza avo pasi musi wa 5 Kukadzi vachiti mari dzavanotambira ishoma.