Mutungamiri weSouth Africa, VaJacob Zuma, neChitatu vakakumbira dare reEuropean Union, kana kuti EU, kuti ribatsire mukubvisa zvirango zvakatemerwa Zimbabwe vachiti izvi ndizvo chete zvingabatsire kupedza kunetsana muhurumende yemubatanidzwa.
VaZuma, avo vanova mutongi gava panyaya yeZimbabwe, vange vachitaura nenhengo dzeparamende dze EU neChitatu.
VaZuma vakamboudzwa nemutungamiri weEU neChipiri, VaHerman Van Rompey, kuti EU inobvisa zvirango zvakatemerwa Zimbabwe kana paine zvayaona zvafamba munyaya dzezvematongerwo enyika.
VaRompey vakati zvirango izvi zvakatemerwa vakuru vehurumende chete kwete vanhuwo zvavo. Asi vanokokera Zanu-PF mudare reparamende, VaJoram Gumbo, vanoti zvirango izvi zviri kubata munhu wese kana nhengo dzeparamende dzose.
Asi imwe nyanzvi munyaya dzezvematongerwo enyika, VaTrevor Maisiri, vanoti maitiro eZanu-PF ndiwo ari kukanganisa zvinhu munyika, kwete zvirango.