Sangano rinomiririra varairidzi vekumaruwa, reAmalgamated Rural Teachers Union of Zimbabwe, kana kuti ARTUZ, rinoti mumwe wevatungamiriri vesangano iri, VaGodfrey Chanda, vambotorwa nevasori ndokuchengetedzwa muGweru kwemaawa maviri, veruzhinji vasingazivi kuti varipi.
Asi VaChanda, avo vanove nhengo yekomiti ye ARTUZ mudunhu reMidlands, vazoregedzwa vachienda kumba mushure mekunge vakomekedzwa kuti vasaite misangano nevarairidzi muGweru.
Mutungamiriri weARTUZ, VaObert Masaraure, vanoti kutorwa kwaVa Chanda kunoitika panguva iyo varairidzi vari pasi pesangano ravo vapinda muzuva repiri vachiramwa mabasa muhurongwa hwavo hwemazuva matatu ekuramwa mabasa.
VaMasaraure vanoti mamwe masangano evarairidzi ari kuramwavo mabasa senzira yekutsigira sangano ravo.
Kuratidzira uku kunopera nemusi weChitatu.
Asi VaMasaraure vati pachaitwa musangano mushure mekuramwa mabasa kuti varonge nhano yekutora.
Tatadza kubata gurukota rezvemabasa, Amai Sekai Nzenza, kuti tinzwe pamire hurumende panyaya iyi asi nharembozha yavo yange isingadavirwi.
Your browser doesn’t support HTML5
Hurukuro naVaObert Masaraure